Ky bulevard është në qendër të Kamzës, por ne u bëmë kurioze dhe shkuam më thellë se kaq. Pas një vëzhgimi në këtë zonë, vumë re se shumica e rrugëve mbajnë emra qytetesh dhe shtetesh të huaja, duke nisur me Romën, New York-un dhe emra tjerë, të cilat na çojnë shumë larg.

Mirëseardhja urohet ndryshe nga çdo qytet tjetër, teksa lexon parullën “Welcome to Kamza city”. Tendenca proevropiane dhe pro-perëndimore është dominante edhe në këtë zonë, pavarësisht se mund të jetë zhgënjyese po ta krahasosh me Amerikën, Parisin apo Manhatan. Fotot e mëposhtme, janë bërë në disa nga rrugicat e Kamzës, e dëshmojnë mjaft qartë këtë gjë.

Tatëpjeta e saj fillon me rrugicat e para, të quajtura Europa, Roma dhe Strasburgu. Pak më tutje duket sikur do nisesh drejt Milanos dhe Brukselit, por në fakt ky iluzion bie menjëherë sapo lexon tabelën pasardhëse në rrugën kryesore të qytetit, e quajtur “Sali Berisha”. Kjo është ndër të paktat rrugë me emërtim shqiptar. Ngjitur me rrugën S. Berisha vjen rruga New York, trotuari i të cilës ka një pamje të zymtë dhe të mbushur me prodhime të ndryshme që shiten nga banorë të kësaj lagjeje.

Nuk mund të lëmë pa përmendur edhe një tjerër qytet mjaft të zhvilluar, Berlinin të cilin duket se e gjejmë dhe në rrugicën e Kamzës, por vështirë se ngjan me të. Çkuptim ka të emërtosh bulevardin “Donald Trump” dhe rrugët me “Amerika, Berluskoni, Paris, Manhatan, Berlini, Teksas..” kur në të vërtetë vërehen ende plehra në rrugë të tilla. Por një gjë është e sigurtë, të huajt do ndjehen si në shtëpi vetëm në Kamëz.