Në përpjekje për t’u dhënë fëmijëve të abuzuar një rrugë të sigurtë për të kërkuar ndihmë, një organizatë spanjolle me emrin ANAR ka krijuar një reklamë shumë të veçantë. E vendosur në rrugë, ajo shfaq mesazhe të ndryshme për fëmijët dhe të ndryshëm për të rriturit. Kështu, një fëmijë që mund të jetë i shoqëruar nga personi që e abuzon ka mundësinë që të shohë mesazhin, i cili shfaqet ndryshe për sytë e tij dhe ndryshe për sytë e agresorit. ANAR ka zhvilluar këtë reklamë që ndryshon në varësi të këndit në të cilin shihet. Për fëmijët nën moshën 10 vjeç që shohin nga këndi i poshtëm, me gjatësi mesatarisht në një maksimum prej 135 cm, djali i shfaqur në foto duket i dhunuar me shenja në fytyrë dhe mesazhi që shfaqet i nxit që të thërrasin për ndihmë duke iu dhënë edhe një numër telefoni. Nga ana tjetër, për një person të rritur që e shikon nga këndi i sipërm në një gjatësi mesatare prej 175 cm, djali nuk duket i dhunuar dhe mesazhi i shfaqur i paralajmëron që të mos dhunojnë fëmijët. Një gjetje vërtetë brilante që të shpresojmë të jetë po aq efikase.