Sukseset e njëspasnjëshme të balerinës shqiptare, duket se po i  hapin rrugën një tjetër suksesi.

Bukuroshja Klaudia Pepa po njeh kulmin e karrierës së saj, duke performuar çdo javë në televizionet italiane, ndërkohë që ajo ka edhe shkollën e saj të baletit në Itali, “Klaudia Dance Academy”.

Klaudia numëron me mijëra ndjekës në rrjetet sociale, të cilët duan të jenë të përditësuar hap pas hapi me veprimtaritë e fundit në karrierën e saj, dhe ajo e bën më së miri këtë.

Një foto e postuar dje në profilin e Klaudias dhe mbi të gjitha komenti i saj pyetës “Çfarë mendoni nëse unë do prezantoja një program televiziv?”, ka nxitur publikun të mendojë nëse balerina do të angazhohet në një projekt jashtë baletit.

Kjo është e vërteta! Tirana Post ka kontaktuar Klaudia Pepën e cila ka konfirmuar që në muajt qershor-korrik do të prezantojë një program muzikor në Sky Uno, një platformë televizive italiane dhe sigurisht që është shumë e lumtur për këtë.

Elegante në maksimum, siç vetëm balerinat mund të jenë, me një stil që e ka sofistikuar shumë së fundmi, Klaudia Pepa do të tentojë televizionin në një drejtim që nuk e kishte provuar deri më tani dhe sigurisht që ne presim të shkëlqejë.