Gjatë hapjes së spektaklit të tij “Last Week Tonight” moderatori John Oliver tha se është shumë e vështirë të besosh se dikur njerëzit mendonin se kandidatura e Donald Trump do të ishte për të qeshur. Më pas tregoi një klip të shkurtër të tij duke moderuar emisionin “The Daily Show” plot 3 vite më parë, ku ai vetën komentonte raportimet se Trump po konsideronte të garonte në zgjedhjet e vitit 2016. Dhe klipi tregon se pikërisht Oliver i dha një shtysë të mirë për t’u futur në garën që do të përzgjedhë liderin e botës së lirë. “Bëje” i tha Oliver Trump-it në klip. “Unë do të të shkruaj personalisht një çek fushate në emër të këtij vendi, i cili nuk dëshiron që ju të jeni president, por do dëshpërimisht që ju të garoni”. Në përfundimin e klipit publiku shpërtheu në të qeshura dhe John Oliver pranoi se nuk ka mënyrë se si të shfajësohet për atë që bëri.