Komisioni Europian ka analizuar programin e reformave ekonomike të Shqipërisë për vitin 2019-2021. Ekspertët shfaqen kritikë në lidhje me financat për arsimin dhe shëndetësinë duke u shprehur se ato janë të ulëta dhe nën mesataren e rajonit. E keqja nuk mbaron këtu, pasi fondet për këta sektorë do të ulen dhe më shumë. Parashikohet që fondet për arsimin do të bien nga 2.5% në 2.2% të PBB, ndërsa ato për shëndetësinë nga 3% në 2.7%. Në këto kushte nuk do të ketë buxhet të mjaftueshëm, që të trajtohet “ikja e trurit” dhe për pasojë emigracioni s’mund të frenohet. Më tej në raport renditen dhe një sërë problematikash të tjera si niveli i lartë i borxhit publik, mbledhja e taksave, papunësia e lartë tek të rinjtë, mungesa e punonjësve të kualifikuar dhe në fund jo për nga rëndësia përmendet dhe rreziku i lartë për pagesat që duhet t’ju jepen koncesionarëve. E bëhet fjalë për rimbursimin e TVSH-së. Komisioni Europian ka marrë në analizë të dhënat e Fondit Monetar Ndërkombëtar dhe ndalet më tepër tek Partneriteti Publik-Privat, që ka arritur në vlerën e 31% të Prodhimit të Brendshëm Bruto dhe pritet që përgjatë vitit 2019 të shtohen dhe me 15%. Një pikë tjetër shqetësuese është dhe informaliteti i lartë në një vend si i yni me të ardhura të ulëta publike. Ndaj dhe qeveria këshillohet që të mos rrisë më taksat, por të shfrytëzojë hapësirën që ka nga evazioni fiskal. Evazioni i TVSH-së ka kapur nivelin e mbi 30% dhe rreth 30% e të punësuarve rezultojnë të padeklaruar.