Koreja e Jugut ka deklaruar se Koreja e Veriut ka tentuar të testojë një tjetër raketë balistike në bregun e saj lindor, që ka dështuar. Koreja e Jugut bëri me dije se testi i dështuar i raketës u krye në afërsi të qytetit koreano-verior Uonson.

BBC shkruan se nuk është e qartë se për çfarë lloj rakete bëhej fjalë, por testi i radhës pasoi 3 tentativa të dështuara të lëshimit të një raketë me rreze të mesme veprimi Musudan që u kryen në prill.

Ndërkohë, Kombet e Bashkuara i kanë ndaluar Koresë së Veriut të zhvillojë teknologji për raketa balistike, diçka që nuk e ka penguar aspak vendin komunist dhe që ka rritur ndjeshëm tensionin në rajon.

Sipas Koresë së Jugut, dyshohet se edhe këtë herë bëhet fjalë për një raketë Musudan, e cila teorikisht ka aftësinë të arrijë Japoninë apo territorin amerikan të Guamit, megjithëse Koreja e Veriut nuk ka mundur që këtë gjeneratë armësh ta testojë me sukses deri tani.