Koreja e Veriut testoi me sukses një raketë të mbushur me të ashtuquajturin karburant solid, njoftoi sot media shtetërore e vendit komunist.

”Pretendimi për këtë test erdhi nga lideri Kim Jong Un, në kohën kur po vizitonte zonën ku do të kryhej lëshimi i raketës”, njoftoi agjencia koreanojugore e lajmeve, Yonhap, që citon agjencinë zyrtare koreanoveriore të lajmeve, KCNA.

”Suksesi i kësaj rakete do të shkaktojë terror dhe tmerr në zemrat e armiqve tanë”, deklaroi Kim.

“Ne do të vazhdojmë të arrijmë suksese në shkencën e mbrojtjes, që do t’i bëjë armiqtë tanë të dridhen nga frika”, shtoi ai.

”Koreja e Jugut po përgatit kundërmasat”, deklaroi Moon Sang Gyun, zëdhënës i Ministrisë koreanojugore të Mbrojtjes Kombëtare.

Ky test vjen në ndërkohë të rritjes së tensionit në gadishull, që kur Pheniani realizoi një shpërthim bërthamor janarin e kaluar dhe lëshoi një raketë me rreze të gjatë veprimi në shkurt.