Kuvendi i Kosovës ka votuar 3 projektligjet për shndërrimin e Forcës së Sigurisë së Kosovës në ushtri. Projektligji u miratua me 96 vota pro.

Ky projektligj rregullon kushtet e përgjithshme të shërbimit në FSK si një shërbim i ndërtuar mbi bazën e parimit të ligjshmërisë, profesionalizmit, komandës, disiplinës, respektit, nderit, ruajtjes së informacionit, komunikimit, jo diskriminimit dhe mundësive të barabarta, paanshmërisë politike, transparencës dhe llogaridhënies.

Në Kuvend u votuan me 101 vota pro projektligji për krijimin e Ministrisë së Mbrojtjes si dhe me 98 vota pro projektligji për Forcën e Sigurisë së Kosovës.

Ndryshe nga mosmarrëveshjet e kohëve të fundit mes palëve politike, në këtë seancë të gjitha grupet parlamentare kanë votuar pro , me përjashtim të Listës serbe, e cila zgjodhi bojkotin.

Kryetari i Kuvendit të Kosovës, Kadri Veseli gjatë një interviste për DW u shpreh se u shtria e Kosovës do të ngrihet me partnerët e Nato-s

Po ashtu edhe përfaqësues të institucioneve të vendit janë shprehur të bindur që për këtë proces kanë edhe mbështetjen e aleatëve ndërkombëtarë të Kosovës. Ata thonë se ky transformim do të përfundoj deri në nëntor të këtij viti.