Është pozitiv fakti që nga viti në vit numri i përdoruesve të internetit në Shqipëri po rritet. Po ana tjetër e medaljes janë mashtrimet kibernetike, përball të cilave përdoruesit shqiptarë janë të ekspozuar dhe ende në vend nuk ka një strategji efektive sa i përket sigurisë kibernetike.

Këshilli për Bashkëpunim Rajonal ka publikuar një raport për vendet e Europës Perëndimore, ku theksohet se për Shqipërinë janë të shumëta mashtrimet kibernetike por edhe përndjekjet online dhe fenomente të tjera për të cilat ka pasur denoncime.

Sipas raportit, shumica e rasteve të krimit kibernetik lidhen me mashtrimin, raste të tjera pëfshihet vjedhja e të dhënave, përndjekjen online, dhe ndërhyrjen në të dhënat. Në rastet e hakërimit autorë janë jo vetëm shqiptarët, por dhe ndërkombëtarë, ndërkohë që rastet e përndjekjes në internet kryesisht kryhen nga shtetas vendas.

Raporti citon që nga viti 2017, rreth 2 milionë njerëz ose 66% e popullsisë së Shqipërisë përdorin internetit.

Edhe pse ka ende zona që nuk mbulohen me valë interneti, në vitin 2017 penetrimi në internet ka arritur në rreth 80% por njëkohësisht është rritur rreziku i mashtrimeve të shqiptarëve. Sipas Këshillit për Bashkëpunim Rajonal kjo shtrirje e internetit në Shqipëri duhet të shoqërohet me një strategji nga ana e institucioneve për Sigurinë Kibernetike. Edhe në Kodin Penal sanksionet për dënimin e mashtrimeve kribernetike janë minimale. Numri i procedurave të regjistruara penale lidhur me mashtrimet kompjuterike është rritur, por dënimet ende mbeten të ulëta, vetëm pesë në vitin 2017 dhe 2016 dhe katër në 2015.