Sot që në orën 08.00 të mëngjesit Bashkia e Tiranës nëpërmjet nismës “Të pastrojmë qytetin” ka nxjerrë në një punë vullnetare gati 10 mijë persona për të pastruar qytetin. Aksioni që zgjati 4-5 orë u përqëndrua në 24 njësitë administrative të kryeqytetit.
Sipas asaj që ishte identifikuar nga bashkia, me shumë ndotje ka pasur në zonat: Varreza, Uzina Dinamo, Serat e bashkisë te Stacioni i Trenit, Njësia 4 te “Njazi Meka”; “Nikolla Jorgo” te njësia 10’ “Gjergj Legisi” te njësia 11 etj.
Që në orët e para të mëngjesit këtij aksioni iu bashkua edhe kryetari i Bashkisë Erion Veliaj me drejtuesit dhe të rinjtë e Forumit Rinor Eurosocialist. Një pjesë e mbeturinave do të dërgohen në ndërmarrjet e riciklimit, ndërsa një pjesë tjetër në landfillet e grumbullimit të plehrave.