Kryeministri Edi Rama është i ftuar mbrëmjen e sotme tek Zonë e Lirë. Çështja e mbylljes së basteve është padyshim tema kryesore që po diskutohet në emision, në një debat mes tij dhe moderatorit Arian Çani.

Kryeministri u shpreh i bindur se në 1 janar çdo pikë kazinoje e llotoje do të mbyllet. “Gratë do marrin dhuratë për vit të ri mbrapsht burrin apo djalin e sëmurë nga bixhozi sepse nuk do ketë më ku të shkojë pasi nga 1 janari nuk do të ketë më bixhoze”, shprehet Rama, ndërkohë që u ka bërë edhe një thirrje publike të gjithë tifozëve të Interit, duke qenë se ai është me Juventusin. “U them publikisht të gjithë tifozëve të Interit, ça keni për t’i hedhur, hidhini se deri më 31 dhjetor nuk do humbi më me Interin”. 

Moderatori u ndal edhe tek Facebook, duke i thënë Ramës se pse nuk e mbyll, duke qenë se të rinjtë po shfrytëzojnë shumë kohë në të. Ndërsa kryeministri u shpreh se shumë shpejt do të ndiqen disa praktika të reja edhe për Facebook-un.

Sipas Ramës, do të ketë penalizime për ata që do të bëjnë "Like" apo "Share" në postimet që janë vetëm "Shpifje".