Kjo është shifra e cila sa vjen e rritet çdo vit në Shqipëri duke shtuar kështu nevojën për gjak, më konkretisht plot 35 mijë njësi. Kryqi i Kuq Shqiptar prej vitit 2005 është angazhuar që t’i shërbejë komunitetit duke promovuar dhurimin vullnetar të gjakut pa pagesë. Të shumta kanë qenë kompanitë që e kanë mbështetur dhe një shembull i mirë është ai i Vodafone Albania, i cili për të 11-tin vit rresht organizoi sot fushatën e tij. 

Christina Samoulada, Drejtoresha e Burimeve Njerëzore, shpjegoi se dhurimi i gjakut është një akt jo vetëm domethënës por edhe shumë efikas. Ajo u shpreh se mesazhi që ky akt përcjell është akoma më i rëndësishëm, pasi nëqoftëse edhe kompani të tjera do të ndiqnin të njëjtën logjikë, do mund të ndihmonin bankat e gjakut në Shqipëri që të plotësonin nevojat e njerëzve që vuajnë. 

Por ja që nevojat e larta për gjak nuk mund të përballohen vetëm nga dhurimi i 65 punonjësve të Vodafone Albania. Për mikrofonin e IN Tv, përfaqësuesja e Kryqit të Kuq Shqiptar, Xhulieta Muçollari u shpreh se pavarësisht fushatave të shumta, kërkesa për gjak vazhdon të mbetet më e lartë se dhuruesit vullnetarë. Ndërkohë ajo bëri thirrje tek të gjithë për t'ju bashkuar kauzës fisnike.

Një thirrje e rëndësishme që urojmë të mos bjerë në vesh të shurdhët, por të sensibilizojë sa më shumë njerëz për t’u kthyer heronj në vetëm një ditë, duke dhuruar gjak!