‘Pabarazitë e mëdha kërcënojnë ekonomitë, komunitetet dhe kombet. Megjithatë, këto pabarazi nuk janë thjesht çështje pasurie. Pabarazitë sociale, racore dhe politike të gjitha që përforcojnë njëra-tjetrën, duke futur njerëzit në një cikël varfërie dhe margjinalizimi’ është ky përfundimi në të cilin ka arritur një raport i publikuar nga UNFPA me titullin “The State of World Population 2017”.

Pozitivi.org duke u mbështetur tek raporti i UNFPA e cila angazhohet për një botë të barabartë veçanërisht për gratë shkruan se në mbarë botën këto pabarazi i përforcon gjinia,pasi shumë gra dhe vajza nuk kanë aksez në kujdesin shëndetësor, seksual dhe riprodhues. Ato nuk janë në gjendje të marrin shërbime të planifikimit familjar e detyrohen të lindin në kushte të pasigurta.

Vajzat kanë më pak mundësi për të përfunduar arsimin apo për të punuar kështu që familjet e tyre janë më të varfra dhe fëmijët me të ardhme të zymtë.

Të gjitha këto probleme citohet në shkrim mund të rregullohen duke vënë në zbatim 10 veprimet e mëposhtme për një botë më të barabartë.

1.Të përmbushen të gjitha detyrimet për të drejtat e njeriut sipas konventave ndërkombëtare.

2.Të eleminohen barrierat që ndalojnë gratë të kenë qasje në informacione, shërbime shëndetësore seksuale dhe riprodhuese

3.Të ofrohet mundësia që gratë e varfra të kenë kujdes thelbësor shëndetësor, edhe gjatë lindjes.

4. Të përmbushen të gjitha nevojat e paplotësuara për planifikimin familjar, duke i dhënë përparësi grave në 40 përqind të familjeve më të varfra.

5.Sigurimi i mbrojtjes sociale në rang universal, që ofron sigurim të të ardhurave duke përfshirë përfitimet dhe mbështetjen e lindjes.

6.Shërbimet mbështetëse, siç është kujdesi për fëmijët, në mënyrë që gratë të kenë mundësi të qëndrojnë në punë.

7.Të miratohen politika progresive që synojnë rritjen e shpejtë të të ardhurave në mesin e 40% të njerëzve më të varfër, duke përfshirë investimet tek vajzat dhe gratë.

8.Eliminimi i pagesave për vajzat, në arsimin e mesëm dhe të lartë.

9.Përshpejtimi i tranzicionit, kalimi nga puna joformale në punë formale dhe të denjë, duke u fokusuar së pari tek sektorët që kanë punëtorë të varfër.

10.Të punohet drejt matjes së të gjitha dimensioneve të pabarazisë dhe si ndikojnë tek njëri-tjetrin, në mënyrë që të merren masa përkatëse.