Andrea Stramaccioni, është i njohur për zbulimin e talentëve të rinj. Është pikërisht i riu Rey Manaj sulmuesi që trajneri italian i Panathinaikos dëshiron të ketë në ekipin e tij.

19-vjeçari shqiptar pritet të transferohet në kampionatin grek në formën e huazimit, për t’u vënë nën urdhrat e Andrea Stramaccionit. Në fakt 40-vjecari italian ka këmbëngulur fillimisht për Rodrigo Palacion, por Mancini nuk ka ndërmend ta largojë sulmuesin argjentinas.

Sipas mediave italiane tek Interi janë të bindur se Manaj do të gjejë hapësirat e nevojshme në formacion për t’u rritur si futbollist, duke e përjashtuar mundësinë e qëndrimit në “Apiano Gentile” ku rivaliteti për një fanellë titullari është shumë i ashpër për djaloshin kuqezi, i cili ishte inspiruesi i Shpresave të Shqipërisë në fitoren 2-1 me Hungarinë në eliminatoret e Europianit.