Në shtator parlamenti italian do të diskutojë projektligjin për legalizmin e kanabisit. Mes polemikash, Komisionet Parlamentare italiane kanë vendosur që diskutimi për miratimin e këtij ligjit dhe votimi të bëhet në shtator.

Ligji i cili ka shkaktuar diskutime të shumta dhe të ashpra mes parlamentarëve italianë, duhej të diskutohej në korrik në parlament, por 2000 amendamentet e prezantuara deri tani, shumica nga kundërshtarë të këtij ligji, kanë bërë që mos të ketë kohë të mjaftueshme për t’i shqyrtuar të gjitha duke e shtyrë diskutimin përfundimisht në muajin shtator. Kjo shtyrje duket si një humbje për palën në favor të liberalizimit të drogave të lehta, por pavarësisht kësaj, futja në procedura parlamentare e këtij ligji në Itali është një ngjarje historike.

Votat në favor të këtij projekti janë 221, por për të marrë maxhorancën e nevojshme duhen 315 vota. Projekti i paraqitur nga Partia Demokratike e Italisë ka të bëjë me legalizimin e kultivimit, përpunimit dhe shitjen e kanabisit dhe derivatëve të tij dhe kjo është hera e parë në historinë parlamentare italiane që një projekt i tillë diskutohet në Parlamentin e Italisë.

Reagimet nga palët politike për këtë ligj janë të ndryshme. Forza Italia ka shprehur qëndrimin e saj kundër këtij ligji. Përfaqësuesit e Partisë Demokratike të Renzit theksojnë se legalizimi çon në një treg të kontrolluar dhe të ligjshëm në vend të një tregu të lirë dhe kriminal, ndërkohë që gjasat janë që në shtator, miratimi i këtij ligji të dështojë “për vetëm një milimetër”.