Teksasi bëhet kështu shteti i tetë amerikan që lejon studentët të mbajnë armë në ndërtesat shkollore. Por shumë studentë dhe zyrtarë të arsimit të lartë druhen se ky ligj i ri do të largojë të rinjtë nga universitet e këtij shteti.

Një ligj i ri hyri në fuqi në shtetin amerikan të Teksasit që i lejon studentët të mbajnë armë në ambientet universitare, por pa i ekspozuar publikisht. Studentët mbi 21-vjeç që kanë leje arme të fshehur mund t'i mbajnë ato edhe në klasë, sipas ligjit të ri.

Ndërsa mbështetësit e ligjit thonë se ky është një hap kritik për vetëmbrojtjen dhe respektimin e të drejtave kushtetuese. Sipas republikanëve teksanë, armëmbajtja në kolegje mund të parandalojë vrasjen masive të radhës.

Ata thonë se vrasësit në të shkuarën kanë shënjestruar zona ku nuk ka armë, si ambientet universitare apo kinematë, sepse nuk hasin asnjë rezistencë.

Por kritikët e ligjit, i cili hyri në fuqi në 50-vjetorin e vrasjes masive në Universitetin e Teksasit që i kushtoi jetën 14 njerëzve, thonë se armëmbajtja në kolegje është një zgjidhje e gabuar që mund të sjellë më shumë dhunë.