Ahed Tamimi, e njohur si adoleshentja palestineze, që u filmua duke i dhënë një shuplakë ushtarit izraelit në Bregun Perëndimor të pushtuar nga forcat e shtetit hebre, është liruar pas tetë muajsh në burg. Rasti i saj nxiti një reagim ndërkombëtar. Ajo u lirua me nënën e saj, Nariman, i cili gjithashtu vuajti dënimin prej tetë muajsh.

Aktivistja adoleshente u prit me duartrokitje. Duke iu drejtuar turmës, Tamimi falënderoi aktivistët dhe mediet për mbështetjen e tyre gjatë qëndrimit të saj në burg. “Rezistenca do të vazhdojë derisa okupimi të hiqet”, i tha ajo mbështetësve. "Ky është një moment shumë i lumtur për mua," tha babai i Tamimit, Bassem, për Al Jazeera para lirimit të vajzës dhe gruas së tij. "Ne kemi humbur shumë, por jam i shqetësuar edhe për shkak se pushtuesi (Izraeli) po vazhdon të jetë në jetën tonë"-deklaroi ai. 

Pas një konference  të shkurtër me gazetarët, Tamimi takoi Presidentin palestinez Mahmud Abbas në zyrën e tij në Ramallah. "Ahed Tamimi është një shembull dhe një shembull i luftës popullore palestineze për liri dhe pavarësi", tha Abbas gjatë pritjes.

Videoja ku Ahed Tamimi goditi ushtarin jashtë shtëpisë së saj në Nabi Saleh vitin e kaluar u bë virale dhe u duartrokit nga e gjithë bota. Për palestinezët ajo u bë simbol i rezistencës ndaj okupimit izraelit, por shumë izraelitë e shohin atë si një krijuese problemesh që kërkon reklamim.  Mbi 16-vjeçaren në kohën kur dhuroi shuplakën fatale, rënduan fillimisht 12 akuza për sulm, nxitje, ndërhyrje dhe hedhje gurësh. Në mars, ajo ra dakord të pranonte fajin për katër nga akuzat, duke përfshirë nxitjen dhe sulmin. Ahed Tamimi u filmua nga nëna e saj, Nariman, duke bërtitur dhe duke sharë dy ushtarë në rrugë më 15 dhjetor 2017. Incidenti u transmetua në faqen e Facebook të Nariman Tamimit dhe videoja e konfrontimit u pa gjerësisht. Në pamjet e publikuara duket teksa ajo godet në fytyrë një ushtar dhe kërcënon tjetrin.

Ahed Tamimi tha në një seancë dëgjimore para gjyqit se ajo kishte sulmuar ushtarët, sepse ajo kishte parë ata të gjuanin kushëririn e saj 15-vjeçar Mohammed në kokë me një plumb gome të njëjtën ditë. Rasti i Ahed Tamimit nxiti një shpërthim të pikëpamjeve thellësisht të kundërta mes izraelitëve dhe palestinezëve. Pas incidentit, Ministri i Arsimit i Izraelit Naftali Bennett tha se ajo meritonte të “kalbej në burg”. Nëna e saj u akuzua gjithashtu për nxitje në mediat sociale dhe sulme. Për palestinezët, ajo është bërë një ikonë kombëtare pasi ata e shohin si akt trimërie gjestin e saj ndaj ushtarëve. Fytyra e saj është shfaqur në muret e rrugëve dhe postera, ndërsa një peticion online i organizuar nga i ati i saj duke bërë thirrje për lirimin e saj grumbulloi 1.7 milion firma.