Me kombëtaren shqiptare, Lorik Cana ka debutuar kundër Zvicrës, ashtu siç edhe në Europian, ndeshjen e parë e ka zhvilluar kundër kombëtares helvete. Mirëpo europiani i tij i parë, nuk nisi ashtu siç e kishte menduar, pasi u bë lojtari i parë, që u ndëshkua me karton të kuq në Euro 2016. Ndoshta ishte më i kritikuari për përfaqësuesen tonë nga tifozët, por kapiteni ynë e ka një shpjegim, dhe atë e ka treguar për francezen L’equipe. Kartonin e kuq ai e quan sakrificë e jo gabim trashanik sic po quhet ai veprim nga shumë specialistë e analistë të sportit.

“Faulli i parë ishte thjeshtë faull. Nuk kisha bërë asnjë faull deri në atë moment dhe arbitri nuk kishte pse të më ndëshkonte me të verdhë. Gjynah se i kishim mundësitë dhe energjitë për të arritur diçka më shumë”,  thotë Cana në deklaratën e tij.

“Seferovic më shtyu pak e më pas unë rrëshqita dhe rashë e duke parë që isha jashtë zone, dhe nuk e arrija dot topin në asnjë mënyrë tjetër, zgjata dorën. Nuk mund të lejoja të shkonte loja në 0-2. Do ishte e parikuperushme. Shpresova që arbitri të vërshëllente për shtyrjen ndaj meje.

Në atë moment nuk e mendova gatë. Po të ishte topi brenda zone nuk e kapja me dorë pasi nuk do doja edhe penallti kundër nesh. Eshtë detyra ime të ndihmoj. Kështu e pashë të arsyeshme. Më vjen keq. Më vjen keq edhe që nuk do jem ndaj Francës në Marsejë.”