Louis van Gaal nuk është i përfshirë në materialin promocional të Manchester Unitedit për turneun përgatitor në Kinë për sezonin 2016-17.

“Red Devils” do të ndeshen me Manchester Cityn dhe Borussia Dortmundin në International Champions Cup në Pekin dhe Shenzhen në korrik.

Van Gaal ishte pjesë e materialit për turnetë në sezonet 2014 dhe 2015. E ardhmja e holandezit në Old Trafford ëhstë në qendër të spekulimeve pasi ai pritet të largohet nga posti i menaxherit në fund të këtij sezoni duke u zëvendësuar nga Jose Mourinho.

Van Gaal ka edhe një vit në kontratën e tij në Old Trafford. Manchester United është jashtë katër pozitave të para në Premierligë përkundër fitores ndaj rivalit të qytetit Manchester City në fundjavën e shkuar.

Pep Guardiola do ta zhvillojë ndeshjen e tij të parë si menaxher i Manchester Cityt pikërisht kundër Unitedit në stadiumin “Bird’s Nest” në kryeqytetin e Kinës, më 25 korrik.