Diçka e tillë pritej të ndodhte dhe ndodhi. Dhjetëra autobusë me muxhahedinë kanë mbërritur në Tiranë. Sikundër tregojnë edhe fotot e siguruara nga “Jeta osh qef”, autobusët kanë ndaluar pas Casa Italia dhe do të strehohen në vazhdim në pallatet që shteti ka vënë në dispozicion të tyre.

Strehimi dhe mbërritja e muxhahedinëve iranianë në Shqipëri ishte një temë shumë e ndjeshme në fillim të vitit të kaluar. Vetë  kryeministri Edi Rama është përpjekur ta shmangë bërjen publike të diskutimit të kësaj teme gjatë vizitës së Sekretarit Amerikan të Shtetit, John Kerry në vendin tonë.

Sekretari i Shtetit gjatë vizitës në muajin shkurt në Tiranë, ka falenderuar Shqipërinë për strehimin e muxhahedinëve. “Gjatë dy viteve të fundit, Shqipëria ka strehuar rreth 1000 muxhahedinë si dhe ka rënë dakord për të strehuar dhe 2000 të tjerë”, ka thënë për Zërin e Amerikës një zyrtar i lartë i Departamentit Amerikan të Shtetit në atë kohë.