Mëngjesin e sotëm janë mbledhur Senatet Akademike, ku është diskutuar lidhur me protestën e studentëve, si dhe mbështetjen që pedagogët e UT, po u japin të rinjve në kauzën e tyre.

Gjatë fjalës së tij, pedagogu dhe drejtues i Departamentit të Gazetarisë në Universitetin e Histori-Filologjisë, Mark Marku, është shprehur se qeveria ka ndërhyrë në autonominë akademike.

"Sot me VKM-të jemi shndërruar në një universitet pa kurrfarë autonomie universitare dhe lirisë akademike.  "A do ta pranojnë ne këtë? Ky është një test për ne. A jemi ne një trupë e vdekur siç shpreson qeveria dhe uron që të jemi? A do të kemi forcë reaguese ta refuzojmë këtë gjëndje? Unë mendoj që po është koha. I kemi të gjitha mundësitë dhe nuk kemi pse të kemi frikë. Nuk ka arsye që një pedagog dhe një njeri i lirë të ketë frikë. Ne duhet të kemi frikë nga frika dhe unë i bëj thirrje të gjithëve të reagojmë sepse kemi dinjitetin dhe duhet ta mbrojmë dhe nuk duhet të lejojmë askënd që të na cënojë", është shprehur Marku.