Mediat ndërkombëtare kanë vlerësuar kombëtaren e Shqipërisë për lojën e saj në ndeshjen me Francën, ndërsa kanë thurur elozhe për organizatorët që u bënë skuadra e parë e kualfikuar në 1/8 e Euro 2016.

Nga Italia në Spanjë e Angli, mediat e këtyre vendeve vunë në dukje ndeshjen e madhe të kombëtares shqiptare, e cila u mund ndaj Francës me dy gola vetëm në minutat e fundit në Grupin A të Euro 2016.

Prestigjozja italiane “La Gazzetta Dello Sport” shkruan në titullin e saj se “Muri i Shqipërisë ra vetëm në fund”, teksa në artikullin në brendësi rrëfen se si skuadra e drejtuar nga Xhani De Biazi vendosi në vështirësi vendasit, që siguruan kualifikimin për në 1/8 e turneut që zhvillojnë në shtëpinë e tyre.

Edhe “TGCom” e “Corriere Dello Sport” tregojnë se si skuadra kuqezi dha gjithçka në fushën e lojës, por në fund gjithçka u vendos nga kualitetet e lojatrëve si Griezman, Pogba dhe Paje, të cilët i dhuruan kualfikimin ekipit francez.

Edhe në Angli, mediat komentuan suksesin e Francës dhe kalimin e saj në fazën tjetër të Euro 2016 pas fitores me zemër në dorë kundër Shqipërisë. Sipas “Daily Mail”, heroi dhe zbulimi i këtij kampionati është Dimitri Paje. Në Spanjë, të përditëshmet sportive i kanë kushtuar shumë hapësirë ndeshjes mes Francës dhe Shqipërisë.

Sipas “Marca”, kombëtarja shqiptare luajti më mirë në pjesën e parë, duke vendosur në vështirësi vendasit që festuan vetëm në fundin e ndeshjes. Në të njëjtën linjë shkon edhe e përditëshmja tjetër madrilene “AS”. Sipas saj skuadra kuqezi e bëri Francën të vuante deri në minutën e fundit. Sigurisht në festë bashkë me skuadrën e tifozët ishin edhe mediat franceze.

Megjithëse nënvizion sfidën e vështirë, “L’Equipe” ekzalton skuadrën e Deshamps si të parën e kualfikuar në 1/8 e Euro 2016. Edhe “France Football” shkruan se se suksesi i “Gjelave” ishte edhe një test force në objektivin final për të fituar trofeun e këtij kompeticioni.