Tashmë është bërë zyrtare dhe Gerard Deulofeu, është futbollisti më i ri i Milanit. Klubi kuqezi komunikoi afrimin e sulmuesit të talentuar spanjoll, ndërsa 22-vjeçari Deulofeu është transferuar te Milani në formë huazimi nga Evertoni deri në përfundim të këtij sezoni. Deulofeu te Milani do të mbajë veshur fanelën me numër 7.

Merkato e klubit kuq e zi pas ardhjes së Deulofeu, mund të vazhdojë me një tjetër ndryshim në ekip. Galliani nisi punën për të bërë një tjetër lëvizje në merkato dhe po punon me klubin e Genoa për një shkëmbim kokë më kokë mes Niang dhe Ocampos. Lucas Ocampos, i rritur në Akademinë e River Plate, është 22 vjeç. Gjatë javës pritet zyrtarizimi.

Në Angli, flitet për një largim të Runit drejt kampionatit kinez. Siç raporton sot britanikja “The Sun”, Runi mund të largohet nga Manchester United gjatë merkatos së verës. Për të, bosët kinezë kanë gati një pagë prej 60 milion paund në vit. Nëse ky transferim arrihet, atëherë Runi do të kthehet në futbollistin me pagën më të lartë në botë.