Në vendin tonë numri i bluzave të bardha për banorë është më i ulët se në  vendet e tjera të rajonit. Shkak është bërë jo vetëm braktisja e vendit nga afro 1.200 mjekë e infermierë, por dhe bllokimi për 4 vjet i specializimeve. Të dhënat zyrtare të Ministrisë së Shëndetësisë flasin se 100 mjekë specialistë mungojnë në rrethe dhe rreth 420 infermierë, fizioterapistë dhe teknikë imazherie. Sa i përket infermierëve ata nuk janë mangët vetëm në spitale, por dhe në qëndra shëndetësore.
Ministria e Shëndetësisë në këto kushte kur pacientët kanë mangësi në shërbime ka ndërmarrë disa nisma një prej tyre është ajo që ‘’josh’’ mjekët me para. Pra mjekët specialistë, që shkojnë në rrethe do të marrin dhe deri në 250 mijë lekë në muaj mbi rrogën. Ndërsa për infermierët hapi për herë të parë një konkurs në platformën “Infermierë për Shqipërinë”.
Për të marrë pjesë në testim për t’u punësuar si infermierë janë regjistruar mbi 3.400 të papunë, të cilëve do t’ju kontrollohen fillimisht dokumenta dhe më pas ata do të bëjnë provimin. Punësimi i tyre do të kryhet më pas bazuar në rankimin e pikëve.