Ushqimet e pasura me acidet yndyrore omega 3 mund të ndihmojnë njerëzit të rimarrin veten pas një ataku në zemër, sugjerojnë ekspertët.

Sipas ekspertëve tek Shkolla Mjekësore e Harvardit, kapsulat e acideve yndyrore omega 3 forcojnë zemrën dhe ulin rrezikun për të pësuar një sulm të dytë.

Sëmundjet kardiovaskulare janë shkaktari i parë i vdekjeve në të gjithë botën, ku tërë gati një të tretën e të gjitha vdekjeve.

Nga këto vdekje, gati 7.4 milionë kanë ndodhur për shkak të sëmundjes koronare të zemrës dhe 6.7 milionë për shkak të goditjes në tru.

Njerëzit që i mbijetojnë një sulmi në zemrës kanë zakonisht zemër më të dobët, duke qenë se dëmtimi i muskujve ul aftësinë e organeve për të pompuar gjak në të gjithë trupin.

Shumë njerëz vazhdojnë të kenë probleme me zemrën për shkak të mënyrës së keqe të jetesës dhe dietës së varfër, që rrisin rrezikun për atak në zemër.

Studimi i ri, i publikuar tek revista mjekësore “Circulation”, sugjeron se vaji i peshkut mund të ndihmojë në shërimin e zemrës. Acidet yndyrore omega 3, që gjenden në nivele të larta tek sardelet, salmoni dhe trofta, përmirësojnë strukturën dhe indet e zemrës, kanë zbuluar ekspertët.

Shkencëtarët e Harvardit kryen një eksperiment tek 360 pacientë që i kishin mbijetuar një sulmi në zemër. Gjysma e të mbijetuarve morën një dozë të lartë të acideve yndyrore omega 3, ndërsa gjysma tjetër jo.

Grupi i parë mori 4 g kapsula çdo ditë për gjashtë muaj pasi kishin pësuar një sulm në zemër, gati katër herë më shumë se doza normale.

Duke qenë se doza ishte shumë e lartë, pacientët ishin gjatë gjithë kohës nën vëzhgimin e mjekëve.

Në fund skanimet treguan se pas gjashtë muajsh ata kishin 5.6% më pak inde të dëmtuara në muskujt e zemrës, krahasuar me individët e tjerë që nuk morën këtë lëndë ushqyese.

Barkushja e tyre të majtë, dhoma e zemrës përgjegjëse për pompimin e gjakut rreth trupit, ishte në gjendje të rrihte 5.8% më fortë, duke mundësuar më shumë pompim të gjakut.

Acidet yndyrore omega 3 përmirësojnë gjithashtu rrjedhjen e gjakut, ulin tensionin e gjakut dhe heqin dhjamin e formuar tek arteriet.

Ekspertët rekomandojnë që njerëzit të konsumojnë të paktën dy racione me peshk në javë, njëri prej të cilëve duhet të jetë i yndyrshëm  për të marrë sa më shumë acide yndyrore omega 3./gazeta shendeti