Kuvendi i Shqipërisë sot ka dështuar për të tretën herë me radhë për të zgjedhur presidentin e ri, pasi asnjë kandidat nuk është propozuar. Pas kësaj, Partia Socialiste po mbledh firmat e nevojshme për të propozuar Ilir Metën si kandidat për presidentin e ri të Republikës.

PS ka nisur mbledhjen e firmave menjëherë pas fjalimit të fortë të Gramoz Ruçit për të mundësuar kandidimin e Metës në raundin e katërt të Kuvendit, nesër në orën 17:00.

Kandidatit për president për t’u zyrtarizuar në garën për Presidentin e ardhshëm i nevojiten 20 firma. Numër ky lehtësisht e arritshëm nga deputetët socialistë, sakaq deputetëve të PS dhe LSI u është bërë thirrje të jenë të gjithë prezent në seancën e nesërme.

Nuk dihet ende qëndrimi i kreut të LSI, Meta, i cili ka thirrur me urgjencë mbledhjen e grupit parlamentar për të vendosur zyrtarisht nëse do ta pranojë apo jo ofertën e socialistëve. Ndërkohë, pritet që në orën 19:30 Partia Socialiste të mbledhë kryesinë.