Në një takim të zhvilluar në qytetin e Lushnjes për strukturën ë Lëvizjes së Gruas për Integrim, Ilir Meta fjalën e tij e përqendroi tek fuqizimi i gruas që sjell dhe fuqizimin e familjes.

“Fuqizimi juaj është fuqizim i familjes, është investim i drejtpërdrejtë. Një nënë çdo të ardhur më shumë që fiton do ta investojë për shkollën e fëmijës, për mirëqenien e familjes. Forcimi dhe fuqizimi i gruas dhe i nënës është fuqizim i familjes dhe kjo është shumë e rëndësishme për shoqërinë tonë të tronditur gjatë këtyre 26 viteve nga trauma të mëdha sociale, që përjeton vazhdimisht, për një pjesë të mirë të të cilave shkaktare është politika konfliktuale, që nuk merret me zgjidhjen e këtyre çështjeve sociale. Politika ka për detyrë t’ i zgjidhë problemet, t’i pakësojë ato dhe jo t’i shtojë dhe t’i rëndojë”, u shpreh Meta.

Fjalën e mori dhe Sekretarja për Marrëdhëniet me Publikun në LSI, Erisa Xhixho, e cila tha se e vetmja forcë politike që i jep shansin çdo të riu e çdo të reje për të kontribuar me vlerat që ka për Shqipërinë.

“LSI është e vetmja forcë politike që i jep shansin çdo të riu, çdo të reje për të kontribuar me vlerat, me kapacitetin e tij për një qytet më të mirë këtu në Lushnje për një vend më të mirë dhe më të zhvilluar, për Shqipërinë tonë. Fuqizimi ekonomik i gruas është shumë i rëndësishëm për fuqizimin politik dhe social të saj. Prandaj të bëhesh pjesë e Lëvizjes Socialiste për Integrim është t’i japësh shansin një gruaje të përfshihet në politikë dhe vendimmarrje”, deklaroi Xhixho.