Presidenti i zgjedhur, Ilir Meta, po flet mbrëmjen e sotme për marrëveshjen Rama-Basha, të arritur pak ditë më parë, që i dha fund zgjidhjes së krizës politike.

Në emisionin “Studio e Hapur”, Meta tha se marrëveshja nuk e penalizon LSI, përkundrazi sipas tij, e favorizon.

“Marrëveshja favorizon LSI. Kjo marrëveshje garanton zgjedhje me opozitën. Ky është rezultat i një angazhimi sistematik i LSI për një kohë të gjatë. Gjithashtu, u krijua një qeveri besimi për të cilën LSI foli për gati dy muaj. Ndjehemi të lehtësuar nga arritja e marrëveshjes. Për fat të mirë, vendi nuk ra në fund të humnerës. Përpjekjet e LSI, të miat dhe të Vasilit kanë qenë të çmuara për kapërcimin e krizës. Marrëveshja penalizon dhe PD dhe PS. Nuk ndodh asnjë penalizim për LSI, sepse ajo nuk është një parti e vogël. Është një garë tërësisht e barabartë mes tre partive. Me rezultatet e vitit 2013 LSI humbi vetëm një mandat, për 200 vota në Elbasan. Në 2015 LSI ka një rritje shumë të ndjeshme, për shkak të punës së jashtëzakonshme”, tha Meta.