Federata shqiptare e Futbollit ka intensifikuar bisedimet me federatat homologe për zhvillimin e një tjetër ndeshjeje miqësore në fund të marsit, pikërisht në datën 29 të këtij muaji.

Ukraina dhe Koreja e Jugut janë dy alternativat më të mundshme për testin e dytë të kuqezinjve për vitin 2016 në kuadër të finaleve të Europianit, ku Shqipëria merr pjesë për herë të parë. Ukraina në fakt nuk është një kundërshtar i panjohur për kuqezinjtë, ndërsa me Korenë e Jugut përfaqësuesja shqiptare nuk është ndeshur kurrë më parë.

Miqësorja e 29-Marsit pritet të përurojë stadiumin Loro Borici që prej muajsh i është nënshtruar rikonstruksionit të plotë, duke e zgjeruar kapacitetin e tij në 17 500 vende.

Federata Shqiptare e Futbollit planifikon që punimet të përfundojnë brenda marsit, cka do të thotë se “Loro Borici” mund t’i hapë dyert për miqësoren e dytë të këtij muaji, pasi më 26 mars kuqezinjtë do të luajnë miqësoren me Austrinë në Vjenë.