Çështja e arrestimit të protestueve kuksiane për taksën në “Rrugën e Kombit” ka bërë që Basha dhe Kryemadhi të zhvillojnë një takim mes tyre.  Pas mbledhjes së dy Grupeve Parlamentare të PD-së dhe LSI-së, kryedemokrati Lulzim Basha, në një dalje për median u shpreh se që sonte do do të vihet në zbatim vendimi unanim i opozitës.
Kryetari i PD, Lulzim Basha u shpreh se opozita do të jetë në krah të popullit, e pranishme në çdo organizim. Ai shtoi se qeveria ka shkelur Kushtetutën dhe demokracia në vend nuk ekziston.
Këtë javë opozita ka paralajmëruar protesta masive dhe u ka bërë thirrje qytetarëve të mos pranojnë asnjë rritje të taksave të vendosur nga kryeministri Edi Rama.

“Në krah të kuksianëve, të cilëve iu grabit buka e gojës. Në krah të gjithë shqiptarëve që u goditen nga taksa e pronës, e ujit dhe e rrugës. Shqipëria gjendet në prag të një humnere ekonomike dhe sociale.
E shiti Shqipërinë dhe u mori shpirtin njerëzve të thjeshtë. Në këtë vend qeveria shkel kushtetutën, në këtë vend drejtësia merr fund nga frika e kryeministrit. Hapësira e vetme është të dalim në krah të qytetarëve në mos bindje civile. Kjo nis këtë jave.
Ky është një vendim unanim i opozitës, e cila nis që sot organizimin e mosbindjes qytetare. Do zbatojmë të gjitha format dhe mënyrat. I bëjmë thirrje qytetarëve të refuzojnë çdo taksë, taksën e ujit, taksën e dritave.”

Ndërkohë që Kryemadhi theksoi që kryeministri Rama po instalon diktaturën në vend.

“Mosbindja qytetare do të thotë të heqësh dorën e Edi Ramës nga xhepat e qytetarëve të varfër. Të heqin shqiptarët litarët që iu kanë hedhur në qafë. Mosbindje do të thotë t’i thuash ik Edi Ramës, dhe boll ua more shpirtin shqiptarëve. U bëj thirrje gazetarëve t’i thoni “Jo” Edi Ramës.
Rama po instalon diktaturën. Protesta qytetare ishte mësim edhe për opozitën. Gratë dhe nënat shqiptare i dhanë dinjitet çdo shqiptari.”