Në kuadër të 550-vjetorit të vdekjes së Skënderbeut, Muzeu Historik Kombëtar çel ekspozitën me titull “Moti i Madh”. Në këtë ekspozitë vizitorët do të njihen me momente nga jeta dhe betejat e Heroit Kombëtar të shqiptarëve, Gjergj Kastrioti-Skënderbeut, i cili ishte përfaqësuesi më konsekuent dhe më i shquar i elitës drejtuese shqiptare, që udhëhoqi me vendosmëri frontin e luftës së shqiptarëve kundër Perandorisë Osmane.
“Kjo ekspozitë përmban disa elemente kryesore të cilët neve I kemi kuruar në mënyrë të tillë që publiku shqiptar ta ndjejë sa më afër frymën e epokës së Skënderbeut. Në qendër të kësaj ekspozite është kambana e Karpenit me tingullin e saj, si gjurmë e kohës, e cila daton në vitin 1465. Po ashtu, përshkrimi i Arbërisë para pushtimit osman pasqyrohet nëpërmjet hartës me principatat shqiptare të kohës, bashkë me emblemat e tyre, fisnikët që morën pjesë në Besëlidhjen e Lezhës, bashkimin politik dhe ushtarak më të rëndësishëm në historinë e shqiptarëve. Gjithashtu në ekspozitë janë dhe disa objekte të tjera të cilat janë të pakta por që janë shpata apo dhe topuze që datojnë në shekullin e xv” – tha drejtori Dorian Koçi në intervistën për In Tv.
Ekspozita “Moti i Madh” është si një kujtim e si një shenjë e bashkësisë arbëreshe që nëpërmjet traditës së vet dhe letërsisë së shkruar e mbajti të pashuar zjarrin e viteve të Skënderbeut për ta ringjallur ashtu si Feniksi në memorien dhe kujtesën kolektive të mbarë shqiptarëve.
“Ideja për realizimin e kësaj ekspozite nisi me rastin e 550 vjetorit të vdekjes së Skënderbeut,duke qenë se qeveria e ka shpallur këtë vit si viti jubilar i Skënderbeut, Muzeu Historik Kombëtar si pjesë e detyrës së tij funksionale vendosi që të hapi siparin e aktiviteteve për Gjergj Kastrioti Skënderbeu pikërisht me këtë aktivitet të rëndësishëm siç është kjo ekspozitë” – shtoi më tej drejtori Koçi.
Figura e Skënderbeut mbeti e gjallë në ndërgjegjen e popullit shqiptar si kujtim i luftës me fitoret e tij legjendare dhe u bë krenaria për një të kaluar, të cilën donin ta përsërisnin. Figura e Skënderbeut ka tërhequr vazhdimisht vëmendjen e ushtarakëve, të burrave të shtetit e në përgjithësi të opinionit publik evropian, të cilët kanë kërkuar të nxirrnin mësime nga përvoja luftarake e shqiptarëve, sidomos kur vendet e tyre luftonin kundër pushtuesve të huaj.
Projeksionet artistike me dokumentarë dhe imazhe nga filmat për Skënderbeun pasurojnë ekspozitën “Moti i Madh” gjatë gjithë hapësirës së hollit kryesor të Muzeut Historik Kombëtar.
19 Nov 2024 
