Andrea Pirlo i dha lamtumirën futbollit, me 5 minutat e fundit të luajtura në MLS-në amerikane, ku aktivizohej vitet e fundit për skuadrën e New York City-t. Fantazisti ishte një emër mjaft i madh në botën e futbollit, duke fituar thuajse të gjithë trofetë e mundshme, si me klubet, ashtu edhe me kombëtaren italiane.

Shumë futbollistë, ish futbollistë, trajnerë, klube dhe institucione futbolli nuk ngurruan të përshëndesin kampionin Pirlo dhe t’i urojnë atij suksese në jetën jashtë fushës së futbollit.

“Ndeshja e fundit në MLS. Kohës time në Neë York City i ka ardhur fundi. Do të doja të thosha disa fjalë. Dua të falënderojë të gjithë për mbështetjen që kanë treguar në këtë qytet të jashtëzakonshëm. Faleminderit për mbështetjen fantastike, faleminderit stafit teknik, faleminderit të gjithë atyre që punuan mbrapa skenës, faleminderit bashkëlojtarë. Jo vetëm aventurës time në NY i erdhi fundi, por edhe aventurës time në futboll si lojtar. Për këtë arsye do të doja të shfrytëzoja rastin të falënderoja familjen dhe fëmijët e mijë për mbështetjen dhe dashurinë që gjithnjë më kanë dhënë, çdo skuadër që kam pasur nderin të luaj për të, çdo bashkëlojtari që kam pasur kënaqësinë të luaj pranë tij, të gjithë atyre njerëzve që e kanë bërë karrierën time kaq të pabesueshme.

Dhe e fundit por jo më e pa rëndësishmja, të gjithë tifozët anembanë botës që treguan gjithnjë përkrahje. Ju gjithmonë do të jeni në anën dhe zemrën time”, shkruan në fund italiani që i magjepsi të gjithë me lojën e tij.