Është ndarë nga jeta në moshën 55- vjeçare gazetari dhe publicisti Fatos Baxhaku.

Lajmin e ndarjes nga jeta në moshë të re e shpërndanë miqtë dhe kolegët e tij në rrjetet sociale.

Ai vuante prej kohësh nga një sëmundje e rëndë. Luftën e përditshme me të ai e humbi sot.

Baxhaku ishte një prej gazetarëve më të njohur në vend duke punuar për vite me radhë nëpër media si drejtues dhe gazetar. Ai ka edukuar dhe gazetarët e rinj pasi ka dhënë dhe kontributin e tij si pedagog.

Fatos Baxhaku do të kujtohet si autori i njohur i reportazheve të shkruara dhe televizive, si studiues i historisë dhe si një penë e mprehtë kritike e tranzicionit shqiptar.

Fatos Baxhaku ka lindur në Tiranë më 9 janar në 1964. Vitet e para të shkollës i kreu në shkollat 8-vjeçare, Emin Duraku dhe " 20 Vjetori".

Shkollimin e mesëm e kreu në gjimnazin "Ismail Qemali". Përgjatë viteve 1982-1986 studioi në Universitetin e Tiranës në fakultetin e Histori-Filologjisë ku u diplomua në histori.

Që nga 1986 e deri në 1992 punoi në Institutin e Historisë së Akademisë së Shkencave. Më pas ka vijuar karrierën e tij si gazetar por edhe si drejtues mediash qoftë në shtyp të shkruar, por edhe në ato vizive.

INTV i shpreh familjes ngushëllime për ndarjen nga jeta të gazetarit të njohur.