Legjenda e muzikës kanadeze, këngëtari dhe poeti Leonard Cohen ka ndërruar jetë në moshën 82 vjeçare. Lajmi i hidhur është publikuar nga adresa e tij zyrtare në Facebook, por nuk janë dhënë detaje mbi shkaqet e vdekjes. “Me hidhërim të thellë raportojmë se poeti legjendar, tekstshkruesi dhe artisti Leonard Cohen ka ndërruar jetë” është thënë në deklaratë. Për ndarjen e tij nga jeta foli dhe djali Adam për revistën Rolling Stone duke treguar se i ati u largua paqësisht me vetëdijen që kishte kompletuar një nga realizimet e tij më të mëdha, pasi edhe në momentet e fundit po shkruante muzikë. Cohen do të mbetet i paharruar për këngë të pavdekshme si “Hallelujah”, ndërkohë që u bë pjesë e Rock and Roll Hall of Fame në vitin 2008.