Miqtë e Shqipërisë duket se nuk janë lodhur ende me klasën politike në vendin tonë, e cila është e aftë të gjejë një mijë e një arësye për të mos rënë dakort. Rasti më flagrant është Reforma në Drejtësi, një premtim i fushatës elektorale nga Edi Rama, e që dhe pas 3 vitesh ende nuk është konkretizuar. Për këtë arsye Raportuesi për Shqipërinë në Parlamentin Europian Knut Fleckenstein ka mbërriti papritmas këtë të martë në Tiranë duke “befasuar” politikën. Duke e quajtur vizitë jozyrtare mbërritjen e tij në Tiranë, Knut Fleckenstein kishte si kryefjalë gjatë takimeve me përfaqësuesit politik Reformën në Drejtësi.

Fleckenstein është takuar fillimisht në Kryesinë e Kuvendit me kryeparlamentarin Ilir Meta, e më pas ai takoi Kryeministrin Edi Rama. Pas takimit me përfaqësuesit e maxhorancës, Fleckenstein është drejtuar për në selinë blu ku është takuar me Lulzim Bashën. Gjatë takimeve më përfaqësueist e lartë të politikës Knut Fleckenstein shoqërohej nga Ambasadorja e Bashkimit Europian në Tiranë, Romana Vllahutin. 

Knut Fleckenstein duket se ka gjithmonë një biletë gati për në Shqipëri, dhe kjo falë “qëndrueshmërisë” së premtimeve të klasës politike!