Nesër në akset rrugore shqiptare krahas efektivëve të policisë shqiptare do të patrullojnë edhe policë kosovarë. Mbërritja e turistëve nga Kosova në Shqipëri për sezonin e pushimeve të verës, ka bërë që policitë e 2 shteteve të firmosin një memorandum bashkëpunimi për shërbime të përbashkëta me qëllim rritjen e masave të sigurisë. Efektivë të Njësive Rajonale Rrugore do të jenë prezentë në segmentet me fluksin më të lartë të levizjeve njëkohësisht edhe në disa zona  turistike, të cilat frekuentohen masivisht nga shtetasit kosovarë. Gjithashtu edhe policë shqiptarë do të patrullojnë në rrugët e Kosovës. “Fillimit të patrullimeve të përbashkëta do t’i paraprijë takimi, i cili do të mbahet nesër në orën 10:00 në Pikën e Kalimit Kufitar Vërnicë, nga ku së bashku me autoritetet e Policisë së Shtetit Shqiptar, zyrtarët policorë do të vazhdojnë detyrën konkrete sipas memorandumit të bashkëpunimit”, thuhet në njoftimin e policisë së Kosovës.