Një atentat që ka ndodhur në mesditë në zonën e “Ujit të Ftohtë” ka tronditur qytetin e Vlorë, pasi janë shkaktuar dy viktima dhe një person i tretë ka mbetur i plagosur. Policia ka rrethuar zonën, ndërsa trupat e dy të rinjve të vrarë janë ende në vendngjarje. Ata janë identifikuar si shtetasit Aurest Rexho dhe Arjan Hasani, ndërsa i plagosur ka mbetur Armando Sulejmani.

I plagosuri ka marrë dy plumba, një në krah dhe një në këmbë por ndodhet jashtë rrezikut për jetën. Ndërkohë, dyshohet se atentatorët i kanë zënë pritë të rinjve në rrugën hyrëse për në Vlorë dhe nga një automjet kanë zbrazur mbi makinën e viktima një karikator kallashnikovi.

Në vendngjarje kanë shkuar menjëherë forca policie, ambulanca dhe hetues të krimeve për të mësuar detajet e plota të atentatit.

Shumë shpejt, policia ka rënë në gjurmët e automjetit të autorëve të dyshuar, që është gjetur duke u djegur në fshatin Babicë të Vlorës, në përpjekje për të humbur gjurmët.