Presidenti i ri i zgjedhur i Shqipërisë, Ilir Meta ka reaguar në lidhje me thirrjen e Presidentit aktual Bujar Nishani, që palët politike të hyjnë në dialog në shërbim të krizës.

Meta priti Kryetarin e Grupit Parlamentar të SPÖ Austriake Andreas Schieder i cili e uroi për zgjedhjen në postin e Presidentit të Republikës.

Ndërsa i ka shprehur mirënjohje për mbështetjen e Austrisë ndaj integrimit evropian të Shqipërisë, Meta ka vlerësuar thirrjen e Presidentit Bujar Nishani për dialog mes Bashës dhe Ramës duke theksuar se duhet bërë gjithçka që opozita të hyjë në zgjedhje.

“Vlerësoj nismën e Presidentit Nishani në shërbim të dialogut politik. Në respekt të parimit të gjithëpërfshirjes duhet bërë gjithçka për të mundësuar pjesëmarrjen e opozitës në zgjedhjet e ardhshme”, është shprehur Meta.

 Në takimin Meta-Schieder, lidhur me rajonin, u tha se roli stabilizues i Shqipërisë duhet forcuar si dhe u vlerësua roli i Austrisë si partner i të gjithë vendeve të Ballkanit.