Pas përfundimit të fazës së dytë të bisedimeve me Tiranës dhe Athinës në Korçë një ditë më parë, ka nisur nga sot zbatimi i marrëveshjes mes të dy vendeve. Bëhet fjalë për varrezat e për ushtarët grekë të rënë në vitet 1940-1941.

Pas këtij hapi ka reaguar dhe Athina zyrtare. Mësohet se Ministria e Jashtme greke ka përshëndetur reagimin e Shqipërisë ndaj kësaj kërkese që Athina e konsideron si “një kërkesë historikisht të drejtë” dhe si një shenjë që “dialogu me frymë konstruktive mund të shpjerë në zgjidhje të problemeve”.
Në një deklaratë të publikuar paraditen e të hënës, Ministria e Jashtme greke e cilëson nisjen e zhvarrimit si një “hap të rëndësishëm që përfundimisht të prehen shpirtrat e ushtarëve grekë të rënë në luftën italo-greke të viteve 1940-1941”.
Deklarata e Ministrisë së Jashtme të Greqisë:
“Në negociatat e Kretës nëntorin e kaluar, u diskutua edhe problemi i varrezave për të rënët grekë. U ra dakord për hapa që po fillojnë sot të zbatohen në bazë të një grafiku konkret, kështu që kjo çështje –mbi të gjitha humanitare- të zgjidhet në mënyrën më të mirë të mundshme. Përshëndesim reagimin e qeverisë shqiptare ndaj kësaj kërkese historikisht të drejtë, që dëshmon se dialogu dhe bashkëpunimi në frymë konstruktive, mund të shpjerë në zgjidhjen e problemeve dhe krijimin e perspektivave pozitive për marrëdhëniet midis vendeve të rajonit dhe popujve të tyre.
Ministria e jashtme do të vazhdojë të punojë me përgjegjshmëri dhe seriozitet për garantimin e interesave tona kombëtare, duke kultivuar rregulla të fqinjësisë së mirë dhe kushte dialogu, gjithmonë në dobi të ndërtimit të së ardhmes së përbashkët europiane që meriton rajoni ynë”.