Kanë filluar sërish punimet në sheshin “Mbreti Petër” në veri të Mitrovicës për të ndërtuar të ashtuquajturën “strukturë betoni”, pas shembjes së murit. Në vendin ku nisi puna për hedhjen e strukturës së betonit ka qenë i pranishëm edhe kryetari i veriut të Mitrovicës, Goran Rakiç. Një ditë më parë ai bëri të ditur se punimet në sheshin Peter do të nisin më 7 shkurt. Rakiç bëri të ditur se ndërtimi do të ketë “një strukture betoni mbështetëse. Do jetë në një lartësi prej 70 centimetrash dhe gjerësi prej 120 centimetrash” dhe , sipas tij, do të “garantojë sigurinë për qytetarët e Komunës së Mitrovicës së veriut”. Komuna e veriut të Mitrovicës e administruar nga serbët, shembi të dielën tërësisht murin e ngritur në dhjetor të vitit të shkruar në pjesën veriore të urës mbi lumin Ibër, që ndan qytetin në dy pjesë. Rrënimi i murit u bë vetëm një ditë pasi qeveria e Kosovës dhe komuna veriore e Mitrovicës arritën marrëveshje, që muri të rrënohet dhe në atë pjesë të bëhet një shëtitore për këmbësorët.