E tillë është edhe Open Source Conference Albania, një konferencë dy ditore, e para në llojin e saj në Shqipëri, e organizuar nga Open Labs Hackerspace, qendra e komunitetit shqiptar e cila promovon teknologjinë e lirë.

Në këtë edicion slogani i konferencës do të jetë “Empowering the Commons”, një slogan që thekson rëndësinë e fuqizimit të burimeve publike të aksesueshme nga kushdo. OSCAL do të mbahet këtë të shtunë dhe të dielë në ambientet e Universitetit Metropolitan të Tiranës, prej orës 9:00 e deri në 18:30, orë të cilat janë planifikuar të mbushen me punime nga 70 prezantuesit pjesëmarrës nga 20 vende të ndryshme të botës. 

Ky edicion i tretë i Oscal pritet të mbledhë më tepër se 400 entuziastë, zhvillues, agjenci, profesionistë të kulturës free open source, të cilët ndajnë së bashku idenë se programet kompjuterike duhet të ofrojnë liri tek përdoruesit dhe të jenë të hapura për komunitetin vendor dhe qeveritë për t'i zhvilluar, përshtatur sipas nevojave të tyre.

Kujdes...aksesi në konferencë është falas, por regjistrimi në website oscal.openlabs.cc është i detyrueshëm!