Po, po sic e lexuat, ish-reperi Fero, që kohët e fundit preferon emrin Khattab dhe sic mund ta dini i është përkushtuar që prej daljes nga burgu në verën e 2023-it besimit islam, është martuar për të dytën herë. 

Ai vazhdon të bëhet protagonist, jo më për shkak të muzikës, nga e cila ka hequr dorë, por nga deklaratat nga rrjetet sociale, që momentalisht i ka mbyllur, po ashtu edhe nga vendimet drastike që ka marrë për jetën, kryesisht për shkak të besimit të tij.

Sipas "Gazeta Insajderi", Khattab-i është larguar përfundimisht nga rrjetet sociale dhe tashmë është martuar me një grua që i përket besimit islam dhe nuk është e njohur për publikun. Madje besohet se arsyeja pse ai është larguar nga vëmendja që të sjellin platformat sociale është pikërisht martesa e re. 

Lajmi nuk është konfirmuar ende nga vetë ish-reperi, ndërsa kujtojmë se më parë ai ka qenë i martuar me modelen Arbenita Ismajli, me të cilën shpresonte për një rikthim deri disa muaj më parë dhe kanë edhe një vajzë bashkë.