Marrëveshja politike tanimë është e arritur. Zgjedhjet lokale do të shtyhen, madje është vendosur dhe për mbajtjen e zgjedhjeve të parakohshme. Kështu është shprehur ish-ministri i Financave, Arben Malaj. 

“Do arrihet fillimisht një marrëveshje që zgjedhjet vendore të shtyhen pak. Hapi i dytë do të jetë krijimi i një qeverie tranzitore, që nuk do të zgjasë deri në zgjedhjet e 2021, por deri në zgjedhjet e parakohshme, dhe duket që palët kanë rënë dakord që kur të arrijnë marrëveshjen për zgjedhjet vendore të kenë caktuar edhe datën e ardhshme. Periudha nga zgjedhjet vendore tek ato parlamentare i jep kësaj qeverie transitore mandatin për një reforme politike', tha Arben Malaj në “A2 CNN”.

Malaj nuk është i vetmi që me bindje thotë se marrëveshja është e arritur. Dje ishte ish-kreu i SHISH, Fatos Klosi që tha se, është e vendosur që zgjedhjet vendore të shtyhen për në tetor. "Zgjedhjet do të bëhen në tetor, kanë rënë dakord. Zgjedhjet lokale, të Kuvendit mbase janë vitin tjetër”, tha ai.