Pas deklaratës së sotme të Kryeministrit Rama për tarifat e shkollimit të studentëve si dhe ligjin e arsimit të lartë kanë reaguar studentët, duke i kthyer përgjigje kryeministrit.

Rama tha se VKM-ja për pagesën vjetore të tarifës së shkollimit ka ndryshuar, duke theksuar se këtë vit të gjithë studentët që e paguanin të plotë tarifën, 50% të saj do ta mbulojë shteti duke përfshirë edhe ata me 4 apo 5. Në vitin e ardhshëm Kryeministri ka thënë se ata që nuk e kanë mesataren mbi 6 e lartë do ta humbasin mbështetjen e shtetit.

Pas kësaj deklratate Lëvizja për Universitetin i kthen përgjigje kryeministrit duke theksuar se shumica dërrmuese e studentëve të masterit do të vazhdojë të paguajë tarifa vjetore nga 60,000 deri në 115,000 lekë (të reja) në vit. Pesha e fuqisë studentore në zgjedhjen e autoriteteve drejtuese të universitetit do të mbetet në 10% mjeran. Vota e një pedagogu do të vijojë të vlejë rreth 300 herë më shumë se ajo e një studenti.

Gjithashtu lidhur me deklaratën e Ramës ku tha se ligji i arsimit të lartë nuk do të preket pavarësisht se ka qenë një nga kërkesat e artikuluara gjatë protestës së studentëve dhe disa pedagogë kanë nisur mbledhjen e firmave, ata shprehen se:

"Qeveria nuk ka treguar se sa do të rritet buxheti i shtetit për arsimin e lartë. Rama tha se në vitet në vijim do të ketë ulje të ndjeshme të kuotave për studimet bachelor në universitetet publike. Çdo ulje tarifash bachelor-i do të shoqërohet me ulje të numrit të studentëve, çka nënkupton se financimi shtetëror për universitetet publike nuk do të ndryshojë ndjeshëm."

Për kërkesat e tyre të paplotësuara, studentët bëjnë thirrje që protestat duhet të vazhdojnë dhe të bëhen më masive deri në plotësimin e të gjitha kërkesave studentore dhe rrëzimin e ligjit të arsimit të lartë.