Pas ngjarjes së rëndë që mori jetën e turistit në Himarë, si pasojë e  keqpërdorimit të mjetit lundrues, policia e Shtetit ka marrë masa ndëshkuese.

 Policia ka bërë me dije se do të sekuestrojë dhe ndëshkojë me masa të ashpra të gjitha mjetet lundruese që thyejnë distancën e sigurisë prej 300 metrash nga vija bregdetare, ata që nuk respektojnë korridoret e hyrje-daljes në det, si edhe qarkullojnë me shpejtësi të lartë në zonat e plazheve.

Njoftimi i Policisë së Shtetit:

"Policia e Shtetit ka marrë masa të plota gjatë periudhës 1 qershor-3 gusht në forca dhe në mjete për garantimin e  sezonit turistik.

Drejtoria e policisë po zbaton Programin e Punës së Drejtorisë së Policisë së Shtetit si dhe Planin për shpërndarjen e forcave e mjeteve policore për garantimin e rendit e të sigurisë publike në zonat turistike.

Ajo konstuar mangësi të theksuara nga Njësitë e Qeverisjes Vendore, në zbatim të VKM Nr. 321, datë 28. 05.2014 “Për sigurinë në det, plazhe, në ujrat e brendshme në thellësi të territorit dhe gjatë ushtrimit të sporteve ujore”.

Disa nga detyrimet e pazbatuara janë:

-identifikimi i zonave të përshtatshme si zona çlodhëse të konsideruara të sigurta dhe të shëndetshme;
- dhënia e autorizimit për plazhe;
- dhënia e lejeve dhe autorizimeve për përdorim publik, sporte ujore;
-heqja e lejeve në rast se përdoruesit nuk përmbushin kushtet;
- vënia e gjobave për përdorimin jashtë kritereve të mjeteve lundruese dhe të kushteve higjeno–sanitare.

Sipas këtyre detyrime që burojnë nga aktet ligjore, qeverisja vendore në bashkëpunim me Drejtorinë e Përgjithshme Detare ka përcaktuar:
- zonat e përdorimit të mjeteve lundruese argëtuese, të cilat të jenë të shënuara në mënyrë të dukshme me shënues të veçantë, ku të tregohen dhe korridoret e hyrjes e daljes nga uji;
-distancat e ushtrimit të aktivitetit të lundrimit nga këto mjete;
-oraret e përdorimit të tyre;
-vendosjen në vende të dukshme të shenjave sinjalizuese si: “Kujdes – zonë ku ndalohet përdorimi i mjeteve lundruese”, “Kujdes – zonë e ndaluar për të notuar”.

Çdo zonë e deklaruar për plazh duhet të ketë:
-kulla vrojtimi për çdo 250 – 300 m, me lartësi 3 metra dhe çdo kullë të ketë vrojtues të trajnuar;
- mjete sinjalizimi dhe komunikimi;
-flamuj, postera për vendet e lejuara për lundrim e argëtim, për pushues.

Nisur sa më sipër ritheksojmë se organet përgjegjëse nuk kanë marrë masa dhe nuk janë krijuar kushtet e nevojshme qoftë edhe në një plazh të vetëm, megjithë komunikimin e vazhdueshëm shkresor të kryer nga ana e Policisë së Shtetit.

Nisur nga ngjarja e rëndë që  ndodhi sot, ku humbi jetën një pushues në zonën e Himarës, Policia e Shtetit informon se Bashkisë Himarë i janë dërguar 6 shkresa zyrtare për plotësimin e detyrimeve që rrjedhin nga VKM nr. 321.
Në çdo takim të zhvilluar me Task Forcën, Policia e Shtetit ka ngritur problematikën për masat e munguara për sigurinë në plazhe nga ana e pushtetit vendor.

Megjithatë shërbimet e Policisë Kufitare janë angazhuar maksimalisht dhe po bëjnë të gjitha përpjekjet për të siguruar jetën e qetësinë e pushuesve në plazhe, sidomos gjatë ushtrimit të aktivitetit me mjete lundruese.

Gjatë kësaj periudhe nga Policia Kufitare e Migracionit ka evidentuar:
 -76 raste dhënie ndihme ndaj 130 personave;
 -21 raste të parandalimit të konflikteve 

 - 37 masa administrative ndaj përdoruesve të mjeteve lundruese për shkelje të ndryshme me një vlerë prej 671.000 lekësh;
 -10 mjete lundruese janë bllokuar për mungesë dokumentacioni dhe shkelje të rregullave të lundrimit në det.