Për herë të parë në historinë e vendit tonë, në datën 5 maj, ne do të jemi mikpritësit e 150 pilotëve nga 28 shtete të ndryshme nga e gjithë bota. Bëhet fjalë për Kampionatin e 9-të Botëror i Paragliding, disiplina Precizion.

Të pranishëm do të jenë, gjithashtu, presidenti i Federatës Ndërkombëtare të Aeronautikës, autoritete të larta të CIVL (Komisioni Ndërkombëtar i Fluturimeve të Lira në FAI), gjyqtarë ndërkombëtarë, ku për herë të parë janë edhe 2 gjyqtarë të licencuar nga Kosova, të cilët gjykojnë një garë të këtij niveli. Për herë të parë do të implementohet transmetimi “live” nga kamerat në vela, gjithashtu për herë të parë dhe enkas për këtë kampionat është realizuar/ndërtuar teknologjia e shfaqjes së rezultateve hap pas hapi nëpër rrjetet sociale, ledëall etj. Eliza Dushku, një ndër krenaritë tona përtej kufijve, është imazhi zyrtar i këtij kampionati. Ajo, gjithashtu, do të jetë edhe prezantuesja e dokumentarit “E dashur Shqipëri”.

Ditët e garave do të jenë të shoqëruara nga shumë të papritura interesante, të cilat kanë pikësynim mbetjen sa më gjatë në memorien e pjesëmarrësve, që të flasin sa më gjatë rreth saj, pse jo edhe në vendet e tyre përkatëse. Ture varkash përgjatë vijës bregdetare, muzikë “live”, koncert rroku e shumë surpriza të tjera do t’i shoqërojnë garuesit tanë, si dhe të gjithë ata që do të shprehin dëshirën që të jenë thjesht dëshmitarë të këtij kampionati në nivel botëror. Këngët polifonike shqiptare gjithashtu do t’i prezantohen “botës” në gjysmën e parë të majit në qytetin e Vlorës.

Një surprizë për të gjithë pjesëmarrësit do të vijë nga fqinjët tanë, Italia. Edhe pse jo pjesëmarrës në këtë garë, ata kanë zgjedhur të jenë pjesë e saj në një mënyrë të veçantë dhe mjaft argëtuese, ejani dhe zbulojeni. Sporte të tjera plot adrenalinë do t’i shoqërojnë këto ditë të veçanta si p.sh.: tur me balona dhe helikopter, beach volley, kanoe, kinema verore, aktivitete edukuese për fëmijë e shumë të tjera. Përveç shijimit të bregdetit, nuk është lënë mënjanë edhe relievi malor, që do të jetë dëshmitar i aktiviteteve të ndryshme, si: marshim, piknik, turi historik, kënd leximi me një pamje që rrallë herë na ndodh të gjendemi.

Ceremonia mbyllëse do të ketë të pranishëm personalitete të ndryshme, duke filluar nga kryeministri i vendit, ministra, zyrtarë të pushtetit vendor së bashku me të gjithë ata që kanë ndihmuar dhe mbështetur në realizimin e Kampionatit të 9-të Botëror të Paragliding. Ju mirëpresim të jeni edhe ju pjesë e tij.