Ka përfunduar takimi i fundit i grupit G mes Shqipërisë dhe Italisë, ndeshje kjo e vlefshme për eleminatoret e Kampionatit Botëror “Rusi 2018”. Një ndeshje shumë e bukur e cila do të mbahet mend gjatë, jo vetëm si dita kur Shqipëria zhvillonte ndeshjen e parë zyrtare në shtëpi me Italinë, por edhe si dita kur Lorik Cana i dha zyrtarisht lamtumirën futbollit të luajtur.
Dalja e fundit në fushë me Kombëtaren nuk ishte me uniformën e lojës, por numrin e tij mbi shpinë e mbanin të gjithë titullarët Kuqezi që zbritën kundër Italisë.
Më pas një përshëndetje për tifozët dhe mbi 16 mijë zërat e pranishëm në “Loro Boriç” nisën të thërrasin njëkohësisht emrin e kapitenit legjendar.

Pjesa e parë: Një fraksion loje me mjaft ritëm nga të dy skuadrat. Kuqezinjtë tanë qarkullojnë bukur topin në mesin e fushës, por rastet për shënim mungojnë. Ndërkohë italianët përpiqen të na mbyllin në gjysmë fushën tonë, por të besuarit e Panuçit janë të vendosur mirë në prapavijë. Duhet thënë që rastet për shënim munguan edhe për “Axurrët”. I vetmi moment i dyshimtë, ishte ai i minutës së 40-të, kur Veseli prek topin me dorë brenda zonës kuqezi, por fatmirësisht për gjyqtarin gjithçka është e rregullt. Këshut mbyllet kjo pjesë e parë loje me të dy skuadrat që i drejtohen dhomave të zhveshjes për të rinisur pas 15 minutash.

Pjesa e dytë: Një pjesë që flet kryesisht për kuqezinjtë. Por, në momentin më të mirë tonin, ndëshkohemi nga Antonio Kandreva, goli i të cilit i jep fitoren italianëve në minutën e 73-të. Panuçi bën disa lëvizje, por sërish nuk arrijmë të shënojmë. Kështu mbyllet kjo ndeshje, me fitoren e “Axurrëve” të cilët na mundin në një takim që luajtëm si të barabartë, madje duke pasur edhe raste shënimi.

Pas 10 sfidash, kuqezinjtë e mbyllin në vendin e 3-të, me 13-të pikë, 1 më shumë se Izraeli.