Maqedonia u përfshi nga rreshje të dendura shiu, ku si pasojë e këtij moti të “çmendur”, në kryeqytetin maqedonas, u shkaktua një tragjedi e vërtetë. Ministria e Punëve të Brendshme konfirmoi se kanë humbur jetën të paktën 20 persona. Nga këta  13 janë identifikuar nga organet kompetente, ndërsa 7 të tjerë janë në proces identifikimi.

Më të goditura janë lagjet Hasanbeg, Haraçinë dhe Stajkovc. Autoritetet thonë se numri viktimave mund të rritet, pasi shumë banorë të këtyre zonave kanë lënë banesat dhe janë larguar dhe ende nuk dihet për fatin e tyre.

Mes viktimave është llogaritur edhe një 13-vjecar, si dhe një grua që humbi jetën nga një shkarkim rrufeje. Ende nuk është bërë i ditur identiteti i viktimave, por besohet se mes tyre ka edhe shqiptarë pasi në këto lagje është i pranishëm ky komunitet.

Banorët kanë akuzuar autoritetet që nuk reaguan në kohë për evakuimin e banorëve dhe që u angazhuan vetëm pas përfundimit të reshjeve.

Vërshimi i ujërave ka qenë i fortë dhe se shumë automjete mbetën të bllokuar në rrugë. Raportohet se lumenjtë kanë shkatërruar shumë rrugë rurale duke lënë të bllokuara disa komuna në Shkup dhe Tetovë.