Orët e para të votimeve për zgjedhjet e pjesshme në Dibër  janë përfshirë  nga disa incidente. Në Maqellarë, një aktivist socialist ka akuzuar deputetin demokrat , Flamur Noka e shoferin e tij, se e kanë goditur dhe kërcënuar me pistoletë. Mirëpo edhe Policia e Dibrës ka reaguar në lidhje me këtë ngjarje, duke deklaruar se , makina tip ‘Audi’ Q-7 me ngjyrë gri me targë AA 007 JF, ku udhëtonte deputeti nuk i ka ndaluar postbllokut të ngritur nga forcat e rendit, ndërsa më pas është përplasur me shtyllën e ndriçimit. Ngjarja ka ndodhur në hyrje të Dobrovës në Dibër. Megjithëse vazhdonin t’i bënin shenjë ndalimi drejtuesit të mjetit, drejtuesi i mjetit përsëri nuk u bind por lëvizi me shpejtësi para në drejtim të qytetit të Peshkopisë duke rrezikuar seriozisht edhe jetën e punonjësve të policisë.

Gjithçka ka nisur nga një konflikt, ku sipas dëshmisë së qytetarit Artan Isakun, deputeti Noka e kishte dhunuar dhe më pas i kishte nxjerr pistoletën. Më herët, PS denoncoi dhunën ndaj qytetarit në fjalë.

 “Sipas policisë, mbështetur nga dëshmia e të dhunuarit, Artan Isakun, deputeti Noka i bëri i nxori armën, bashkë me shoferin e tij. Më datë 11.09.2016, rreth orës 02.00 jemi njoftuar nga Stacioni i Policisë Maqellarë se ishte paraqitur shtetasi D.I, i cili deklaronte se në afërsi të shkollës së mesme Maqellarë është goditur nga disa persona dhe konkretisht nga deputeti i Partisë Demokratike F.N, shoferi i tij dhe shtetasi D. S. Gjithashtu shtetasi D.I, në kallëzimin paraprak të bërë me gojë ka deklaruar se gjatë ngjarjes deputeti F. N. dhe shoferi i tij kanë nxjerrë dhe armë zjarri të tipit pistoletë.

Nisur nga kallëzimi i bërë nga ky shtetas, menjëherë nga ana e shërbimeve të Komisariatit Policise Dibër u morën masat e nevojshme për dokumentimin e ngjarjes ku në drejtim të Maqellarës u dërguan disa forca policie. Në hyrje të Dobrovës nga ana e shërbimeve të policisë është konstatuar automjeti tip Audi Q-7 me ngjyrë gri me targë AA 007 JF, mjet me të cilin sipas informacioneve dhe kallzimit të shtetasit D. I., udhëtonin autorët e ngjarjes së ndodhur. Shërbimet e policisë të cilët lëviznin me dy mjete policie sapo konstatuan mjetin e mësipërm organizuan pikë kontrolli të shpejtë duke i bërë shenjë ndalimi drejtuesit të mjetit tip Audi. Drejtuesi i mjetit nuk i’u bind urdhrave të punonjësve të policisë, por me shpejtësi lëvizi indietro dhe si pasojë u përplas në një nga shtyllat e ndriçimit duke e dëmtuar atë plotësisht.

Megjithëse punonjësit e policisë vazhdonin t’i bënin shenjë ndalimi drejtuesit të mjetit, ai përsëri nuk u bind por lëvizi me shpejtësi para në drejtim të qytetit Peshkopi duke rrezikuar seriozisht edhe jetën e punonjësve të policisë. Shtetasit të dëmtuar D. I. i është marrë kallzimi me shkrim ku ndër të tjera ka deklaruar se: Rreth orës 01.50 në vendin e quajtur para shkollës së mesme Maqellarë i ka prerë dhe bllokuar rrugën në mënyrë të befasishme një automjet tip Audi Q-7 me ngjyrë gri ku tek targat ka fiksuar vetëm numrat 007. Nga automjeti i mësipërm kanë zbritur tre persona nga të cilët ka identifikuar deputetin e Partisë Demokratike F.N., shoferin e tij (të paidentifikuar me emër) dhe shtetasin D.S.

Sipas deklarimeve të të dëmtuarit, deputeti F.N dhe shoferi i tij kanë qenë të armatosur me Pistoleta. Ata i janë prezantuar të dëmtuarit shtetasit D. I. se jemi punonjës policie dhe do të kontrollojmë mjetin dhe personat. I dëmtuari u është përgjigjur se unë ju njoh se kush jeni dhe ju nuk keni asnjë lidhje me policinë. Pas këtij momenti deputeti F. N. e ka goditur me grushta shtetasin D. I. dhe po të njëjtin veprim e kanë bërë dhe shoferi i tij si dhe shtetasi D. S. Më pas i dëmtuari është nisur për në banesën e tij në fshatin Dovolan, ku në hyrje të fshatit Herbel shtetasit e mësipërm po me të njëtin automjet kanë tentuar t’i bllokojnë përsëri rrugën por ai ka shfrytëzuar një hapësirë dhe është larguar me shpejtësi. Në lidhje me këtë ngjarje nga ana jonë është bërë shoqërimi në ambientet e Komisariatit Policise Dibër i shtetasit D. S, ish-punonjës policie dhe po punohet per dokumentimin e plotë ligjor të ngjarjes. Për të gjitha veprimet e kryera si dhe për rrethanat e ngjarjes së ndodhur është vënë në djeni Prokurori.

Pas kësaj deklarate të Policisë, ish-Ministri i Brendshëm Noka ka deklaruar se këto zëra janë shpifje.

“Asgjë nga kjo ngjarje nuk është e vërtetë, – tha Noka për mediat. – Ata janë në panik dhe në panik përpiqen të mashtrojnë qytetarët Ne jemi duke ndjekur procesin e  votimit që po shkon mjaft qetë.”

I pyetur për faktin se deklarata e policisë së Dibrës jep të dhëna për targën e makinës së tij, ndodhur në vendin ku ndodhi incidenti, Noka tha se “makina ime qarkullon gjatë gjithë kohës dhe unë nuk jam ndonjë njeri sekret. Unë po lëviz kudo për të kontribuar në fitoren e Sherefedin Shehut këtu.”