Kandidati i LSI në listat zgjedhore të 2017, Ralf Gjoni ka pranuar ditën e sotme mandatin e deputetit dhe ka dorëzuar në KQZ formularin e vetëdeklarimit.

'Sot kam dorëzuar pranë KQZ formularin e vetëdeklarimit për garantimin e integritetit të kandidatit dhe në varësi të vendimit të KQZ kam vendosur pranimin e mandatit të deputetit në Kuvendin e Shqipërisë, sipas ligjit dhe në funksion të Kushtetutës', ka shkruar Gjoni në Facebook.

Gjoni në reagimin e pak minutave më parë, që është dhe i pari pas marrjes së mandatit, ka thënë se ka qenë vendimi më i vështirë politik në jetën e tij.

'Ky ka qenë ndoshta vendimi më i vështirë politik në jetën time dhe pas një konsultimi të gjerë e të gjatë me familjen time, miq të afërt e kolegë brenda e jashtë vendit si dhe me votues e aktivistë të shumtë që më kanë mbështetur gjatë fushatës elektorale - kam vendosur të vazhdoj shërbimin tim ndaj axhendës Euro-Atlantike të vendit e të jem në krahun e drejtë të historisë.'

Më tej Ralf Gjoni, ka theksuar se emri dhe integriteti i tij nuk mund ti shërbejë kurrë desatabilizimit të vendit.

'Emri e integriteti im nuk mund t’i shërbejnë kurrë destabilizimit të vendit, ndaj sot të gjithë duhet të marrin përgjegjësitë që kanë për të garantuar funksionimin normal të Parlamentit, si themel i shtetit shqiptar. Shqiptarët meritojnë qetësi, progres e shpresë për të ardhmen...'

Sakaq, kujtojmë se në momentet e para të kur emri i tij u përfol se do të pranonte mandatin, Gjoni postoi foto me europarlamentarin Knut Fleckenstein si për të treguar mbështetjen nga ndërkombëtaërt.